Та санал хүсэлт, өргөдөл, гомдлоо энэ хэсэгт оруулна уу.


Түүний өөрчлөлтийн түүх



“Засаглалд залуу сэтгүүлчдийн оролцоо хөтөлбөрт хамрагдахаас өмнөх би, өнөөдрийн би хоёрын хооронд том зай, өөрчлөлтүүд бий” -З.Энхбаяр

Түүний нэрийг Энхбаяр гэдэг. Эршүүд нэртэй энэ бүсгүй одоо 28 настай. Үхрийн орд. Ээж, ах хоёртойгоо амьдардаг.

Ахлах сургуулийн 8 дугаар ангид сурч байхдаа эссэ бичлэгийн уралдаанд түрүүлсэн цагаас хойш бичих сонирхолтой болж, 2013 онд СУИС-ийн харъяа РТВМУС-д сэтгүүлч мэргэжлийг сонгон элсчээ.

“Анх их сургуульд ороод зурагтаар гардаг хүн л болно гэж боддог байлаа. Харин 2 жилийн дараа энэ нь амаргүй болохыг ухаарсан юм.”


Сургуулиа төгсөөд 2013 онд “Одон” ТВ, 2016 оноос “Эко” ТВ-ын мэдээний албанд орж ажилласан ч аль аль нь мэдээний алба нь татан буугдсанаас ажлаасаа гарав. Ажлаасаа гарснаас хойш хагас жил орчим гэртээ сууж, идэвх санаачилга ч унтарч эхлэв. Гэтэл нэг өдөр багын найз нь ярьж “Засаглалд залуу сэтгүүлчдийн оролцоо” гээд “гоё” хөтөлбөр хэрэгжиж, шинэ элсэлтээ авч байгааг хэлжээ. Ажилгүй, цаг завтай байсан тэрээр ямар ч гэсэн хүсэлтээ өгөхөөр шийдэн, хүсэлтээ илгээв.

Хэд хоногийн дараа ярилцлаганд дуудагдан, эцэст нь тэнцсэн хариу авчээ.

“Анхандаа танхимын “гоё” сургалт байна гэж бодсон. Анхны өдөр сургалтандаа суугаад харьж явах замдаа мэдээлэл өгсөн найз руугаа ярьж, талархаад барахгүй байгаагаа хэлж билээ. Би маш их хөөрсөн байсан. Яриад л байсан яриад л байсан...”

 


Сургалтын эхний өдрөөс л түүний өмнө нь сурч байгаагүй арга барилтай, өөр, сонирхолтой сургалт болох нь мэдэгдэж байв. Баярласандаа тааралдсан хүн бүрт л энэ тухайгаа ярьж явжээ. Хөтөлбөрт хамрагдсанаар сэтгүүлчийн ур чадвараа дээшлүүлэхээс гадна засаглал, иргэний оролцоо, хүний эрх, эрх тэгш байдал, иргэн-төрийн хамтын ажиллагаа, иргэний хяналт гэх мэт олон талын агуулгыг авчээ. Хорооныхоо хуралд ч сууж үзээгүй тэрээр иргэн хүнийхээ хувьд төрийн үйлчилгээ ямар байх ёстой, хэнд хэрхэн зөв шаардлагыг тавих хэрэгтэйг олж мэдэж, иргэний хяналттай нүдээр эргэн тойрноо харж, юмс өөрчлөгдөх ёстой гэсэн байр суурьтай болсон байна. Найзуудтай болж, багаар ажиллаж сурчээ. Ажилд ч ороод амжив. Тэрээр “Стар” ТВ-ын мэдээний албанд орж, мэдээ уншдаг болов. Гэвч ингээд ханасангүй.

Энэ нийгмийг сайн сайхан болгоход чиглэсэн, иргэд өөрсдөө хяналт тавьж болдог талаар харуулахыг хүсэж “Шүгэл үлээгч” болохыг хүсэж байв. Иймдээ ч “Шүгэл үлээгч” нэвтрүүлгийг санаачлан, Мэргэжлийн Хяналтын Ерөнхий Газартай хамтран хэрэгжүүлж эхлэв.


“Нэвтрүүлгийн гол зорилго нь энэ нийгмийг болохгүй, бүтэхгүйгээр булах биш, өөрсдөө эхлэн өөрчлөгдөх хэрэгтэйг харуулахыг зорьсон юм. Бид өөрсдөө хяналт тавьж, оролцож эхлсэнээр нийгмийн тулгамдсан асуудлууд бага ч болов засарч эхлэх юм.”

Одоогийн байдлаар таван дугаар цацагдаж, иргэдээс 3000 гаруй хандалт авч байна. Цаашид тэрээр хуулийн мэргэжлийг давхар эзэмшин, иргэдэд энэ талын мэдээллийг тэнцвэртэй, ойлгомжтой байдлаар хүргэхэд чиглэсэн нэвтрүүлэг, контент хийхээр зорин ажиллаж байна.

Эцэст нь тэрээр залуучуудад хандан нийгмийн сайн сайхны төлөө оролцоотой, санаачилгатай байвал олон олон гарц, шийдлүүд эргэн тойронд бийг хэлэхийг хүссэн юм.

Г.Төгөлдөрзаяа

 

 

 

2017-04-30